لغبطة التدريب عالحمام.. من الميلاد ؟ من عامين؟

وأنا بحاول اليومين دول اني اقرأ وابدأ مع صالح (سنتين واربع شهور) التدريب عالحمام من جديد .. بسترجع ذكراياتي وتجربتي الطويلة مع الموضوع.

تجربتي فيها نجاحات فخورة بيها جدا وبحمد ربنا مئات المرات عليها، وفيها اخفاقات كتيرة اثرت على ابني ونفسي سلبيا. حجات اتعلمتها وحجات توهتني وحجات لغبطتلي دماغي.

البداية قبل العام:

بدئنا من وصالح ٧ شهور وأنا عرفت من والدتي وبعض الاشخاص القلائل اللي قالولنا عالتعود عالحمام من قبل العام.. وعرفت ان الموضوع برة مصر بقى له تيار كبير ناس بتتبعه اسمه 
Elimination Communication” 
وبالفعل اشتريت الكتاب عشان اقدر اشوف نظام الموضوع ويناسبني ولا لأ... لقيته فعلا مش صعب ومش كارثة زي ماكنا متخيلين.. وإن ببساطة الرضيع اسهل بكتير تعويده لأنه بيدي اشارات تبين هو عايز يعمل ف هوب بتقعديه عالقصرية او قاعدة الحمام.. الموضوع يصل انك بتعوديه من الاربعين وعالبول والبراز مش التاني بس!

قررت إني اجرب مع التبرز، والموضوع طلع سهل جدا، اول ما ابني يبلم ويبدأ يحزق هوب بحطه عالقصرية ويعمل عليها... وفضلنا مستمرين من سن ٧ شهور (مع التوقفات البسيطة) بناخد معانا القصرية في كل مكان، وسايبة واحدة في بيت أمي والموضوع الحمدلله ماشي تمام. وهو قاعد كنت بعمل صوت حزق واقول كيكي. بيقولوا ان الطفل حيتعود بعد كدة اول مايقعد عالقصرية وتقولي الصوت ده انه يعمل!

 استمرينا لحد ما ربنا فاجئني بصالح وهو عنده سنة وشهرين وبيعملي صوت بيعبر فيه انه عايز يدخل الحمام!! بالفعل بدأ يتواصل ويعمل صوت حزق اللي كنت بعملهوله وهو عالقصرية، عشان يقولي انه عايز يقعد. 
لدرجة اني كنت مسافرة خارج مصر أنا واختي ولقيته بيتواصل معايا حتى في وقت زي ده عشان يقعد عالقصرية.. كنت بمشي بكيس كبير فيه القصرية عشان لما يعوز.. وكل ده عالتبرز فقط.


اقدر اجزم إن الموضوع ده من أكثر القرارات اللي أنا فخورة اني اخذتها بفضل الله في رحلتنا التربوية.





وكعادة اي طفل واي أم مصرية بتاخد الأمور على قلبها بدأت اتعصب لما ينتكس، وبفعل ذكائي :/ انتكس شهرين، مش فارق معاه خالص انه يتوسخ مع انها حاجة كانت مستحيلة! 

لكن الحمدلله ان ربنا بينبهنا لأخطئنا ورجعت اصلحت من نفسي وطريقتي، وحاولت ارجعه تاني، وفعلا بقيت اقنعه بلطافة يقعد بعد مايفطر (وقته المعتاد) ورجع تاني الحمدلله.

جينا عالسنة ونص وركب في دماغي اني ادربه عالحمام تماما!!

تدريب عالحمام من عام ونصف:

طبعا كنت شايفة ابني سوبر! ده متعود عالحمام من ٧ شهور! اكيد الموضوع حيكون سهل قوي ويعدي ببساطة

شوفتلي كام فيديو بيقولك علم طفلك في يوم و٣ ايام وهوب ركب دماغي الهبل والتجارة دي!

ومع ايماني واختلافي مع منهج الستيكارات والجوايز ف طبعا الهبل اللي في السطر اللي فات كان مستحيل!

اول يوم ده كان مسخرة، اتزحلقت في التويلت بتاعه ورجلي ورمت والولد كان مذهول!

مع انه كان متعرف على اعضائه اكثر من اغلب اللي في سنه بس ادراكه لعضوه الأمامي ومهمته ماكنش مستوعبها قوي زي الفترة دي.

بعد شهرين من نجاح وانتكاس، والحال ماشي مافيهوش تقدم زايد.. ماشيين رتم واحد، شغالة بتنبأي أنا،، من تعبي بدأت اتنرفز وطبعا اتضايقت جدا من الحال اللي وصلناله، بعد ما كان الموضوع باديئ بوقت بنعمل فيه تواصل ونفضل نقرأ قصص ونتعلم عن الحيوانات ونستفيد بالوقت ده.. تعبت جدا من بلل السجاد وتنظيفي المستمر، وقررت اتراجع ويلبس الحفاض تاني، حفاظا على نفسيته لانه يعتبر لسة بيبي بيرضع وعشان اعصابي أنا كمان وعلاقتنا ترجع حلوة.

كيلوت قطني
كيلوت قطني مبطن
حفاض قطني/كافولة
مميزات الموضوع:

١- الإحساس بالبلل والتعرف على اعضائه وبتعمل ايه 
٢- قدر يتحكم في العضلة بالفعل في اليوم الرابع بل ويتواصل انه عايز يعمل
٣- بدأ يمسك نفسه فترات طويلة
٤- تعوده عالقصرية من الصغر كان مسهل جدا عملية القعاد عليها لانه ماكنش خايف منها وبيعتبرها صديق ورفيق 
٥- كنت بقعده حسب المواعيد اللي بحسبها ونادرا قوي كان بيتواصل عالتبول
٦- الرجوع للحفاض قرار مش خطأ في سبيل الحفاظ على نفسية طفلي وكذلك اعصابي.

العيوب:

١- بما انه كان لسة صغير ف ادراكه مش كامل خالص انه يستوعب ان الموضوع ده مش لعبة وانه لازم يتواصل دايما 
٢-فضلت اعصابي رائعة ومتزنة، هادية ومش بلوم ولا اعاتب، لكن الفت نظره ببساطة، لكن بدأت اتخنق وافقد اعصابي بعد شهرين
٣- توقعاتي العالية واعصابي اللي تعبت خلتني مش قادرة استحمل ف اضطريت اني ارجع للحفاض تاني
٤- كنت بضطر احيانا افرجه على فيديوهات عالتاب عشان يقعد وده عوده في الفترة ديه عليها، وده كان سبب ثاني اني رجعت للحفاض عشان اكسر العادة الجديدة دي
٥-عدم تعوده على قاعدة التويلت خليته مايقعدش غير عالقصرية بس ولازم نفضل نتنقل بيها.
كتب عن التدريب عالحمام للطفل
كتب للتسلية اثناء الحمام
كتاب لي (ليس مثالي واختلف معه في بعض الأمور لكنه مفيد عالعموم)









الدروس المستفادة:

>اني ماقراش او اشوف مناهج بتاعة حيتعود بسرعة

>ماعتبرش نجاح حد بوسيلة وطريقة معينة نموذج يمشي على ابني! لأن كل طفل له طبيعة شخصية مختلفة ومدخل مختلف

>كان لازم اعرف ان التعود الحقيقي والاستمرار عالقصرية بيحتاج من ست اشهر ل سنة!

>افخر من شجاعتي وان ابني استفاد من التجربة ديه انه اتعرف على جسده، وعلى قد انه مابقاش يتواصل خالص (للبول) بعد فترة ، لكن عالاقل بقى مدرك اعضائه كويس جدا ومستمر بقوة في التبرز في النونية (مع نكسات قليلة الحمدلله)

>ادركت اهمية الطفل انه حتى لو مش حيتدرب عالقصرية، ف ممكن الأم تعمل ساعتين ل ٣ يوميا او عدة مرات اسبوعيا يكون فيها بدون حفاض عشان يشعر بأعضائه ، ويشعر بالبلل.

>ادركت فعلا اهمية الحفاض القماشي او الكفولة، ومع اني مستخدمتوش لكني قررت اني استخدمه مستقبليا مع طفل ثاني بإذن الله

>اتعلمت ان احيانا الطفل بيكون عايز هو يمسك زمام الأمور تماما ومش عايزك تفضلي تزني على نفوخه عشان يقعد

>انك تعوديه يعتمد على نفسه في اكله ويلبس نفسه عشان ياخد المبادرة في الموضوع ويتحرك ومايعتمدش عليكي.

>افهم قدرات سنه العقلية والفيسيولوجية، وانه حتى لو اتدرب على سن سنتين ولا حتى ثلاثة! ف  هو برضو حيفضل ينتكس ويفضل يبل سريره يمكن لسن اربع وخمس سنوات! وطالما انتي متزنة ومش عصبية ولا بتنهريه وتهينيه الدنيا حتكون تمام بإذن الله

>قرار صائب جدا انك توقفي فترة وتاخدي نفس بدل ماتتعبي المسكين وانتي كمان مسكينة :D

>اخيرا، ماتقارنيش ابنك بطفل تاني

> ماتقريش تجارب تجارية كتير والأفضل تقري من نصائح مختصين

>بطلي شكوى وهري عالنت ومع اصحابك، راعي انه بيسمعك وبيحس بطاقتك السلبية وده بيزود جدا! ماتخليش اسراركم عند كل العيلة وبالتالي كل اللي بيشوفوه بيغلس عليه 


نصايح هامة للعودة من جديد...

* ماتبدأيش وهو ماعندوش استعداد*

*اقروا سوا كتب اطفال بتشجع عالتدريب عالحمام

*فهميه الموضوع وحببيه فيه مش في الجوايز والستيكارات

*بلاش المملح والحجات اللي بتستعجل عالفاضي وتضر جسمه

*اوعي تعاقبيه لكونه طفل، ولأنك عودتيه من البداية على حفاض عالي الامتصاص عمره ما حسسه بالبلل (حضرتك اتعلمتي الحمام بدري لانك كنتي بتلبسي كافول)

*تاني، ماتعقبيهوش اصلا

*خليه يدخل معاكي الحمام واشرحيله الموضوع منغير لفت النظر لعورتكم

*خليه يودع التويلت في الحمام ويشد السيفون بنفسه ( باي كيكي)

*ممكن كمان العروسة اللي بتعمل تويلت في قصرية تكون عامل مشجع

*خلي العابه المفضلة يشاركوه التجربة

*كل كام يوم فكري في حاجة او لعبة تجذبه للقصرية

*بدل ما تقوليله عايز تقعد عالحمام، قوليله يلا معاد الحمام، تحب تروح وانت بتجري ولا وانت بتمشي زي النملة (العاب مختلفة)

*تتنبأي بوقت تبوله وتبرزه، مثلا التبول اول مايصحى من النوم بعد الاكل التبرز، وغالبا بيتبول كل ساعة ونص لساعتين، وتقومي مقعداه.. لكن مش جبراه!


*هاتيله حجات تسليه وقت قاعدة الحمام منغير شاشات.

اديه حرية التحكم واتخاذ القرار في جلوسه إن اراد*

-------
تدريب صالح عالحمام تماما بعد العامين:

صالح كان مستعد سنتين الا شهر لكن لأسباب رجعالي قررت اصبر شوية لحد سنتين واربع اشهر.. الموضوع بفضل الله ماكنش فيه اي مشكلة لأن القصرية دي صديقته. ف بالتالي كان بيقعد عادي، يقعد وهو بيلعب. بما انه كبر ف كان متضرر جدا انه بيبل نفسه. اول خطوة يقول بعد مايعمل، بعدين بقى يقول وهو بيعمل، واخيرا بدأ يقول قبلها بفضل الله. بقى يمسك نفسه مدة طويلة، ويمسك عورته لما يكون مزنوق ف اقوله وقت الحمام. مش بسأله لانه دايما يقول مش عايز، ف بقوله معاد الحمام والفت نظره انه عايز يعمل بأنه ماسك نفسه، ف يسمع كلامي بالذات بأشياء ملفتة، مش ستيكارات وحلويات لاننا ضد الموضوع ده. لكن بأي حاجة بيحبها زي العابه او اكل بيحبه او الدبة بتعته حتقعد معاه وهكذا.
في البيت بنلبس كيلوت قطني، بيت ماما بنلبس الكيلوت اللي فيه طبقة بسيطة متبطنة، واثناء النوم حفاض قطني (شبيه بالكافولة). اول مابيصحى من النوم بقوله تعالى معايا ندخل الحمام سوا، عشان اشجعه. وبراعي انه قبل النوم يكون عمل حمام.
الحمدلله المرادي عشان هو مستعد جدا ف أنا كنت هادئة تماما ولما كان بيعمل عالارض ماكنتش بعلق خالص وبمسح بفوطة وازازة معبيها ديتول وماية انظف كل شوية. ماشيلناش سجاجيد، السنادي غير تجربة السنة اللي فاتت. عشان السن والاستعداد ، الحوادث اقل بكتير والنتيجة اسرع ومداها طويل بإذن الله.
اتعلمت من التجربة دي اني كان ممكن تجربة السنة اللي فاتت تنجح لو ماكنتش حطيت في دماغي انه يكون تدريب كامل، ولكني كنت البسه كافولة او حفاض قطني بالاضافة اني اعمل ساعات في الاسبوع او يوميا بدون حفاض عشان يتعرف على جسده.
وادينا بنتعلم :)

اتمنا تكون تجربتي افادتكم :)

يمكن معرفة المزيد عن اشارات تدل على استعداده من هذا الرابط



شاركينا نصايحك  وتجربتك او اي تعقيب او إضافة:)


ولا تنسوا أن تشاركوها غيركم إن وجدتموها مفيدة  :)


اللهم ارزقنا الإخلاص وانفعنا وانفع بنا :)


لمتابعة الجروب عالفيسبوك

تعليقات

المشاركات الشائعة من هذه المدونة

تنظيم نوم الرضيع من عمر ٣ أشهر

كتب صالح من معرض كتاب القاهرة ٢٠١٨ - سنتين فما فوق

اصنع بنفسك "مسجد للأطفال" ...نشاط رمضاني