ليه ارضع طبيعي؟

الرضاعة مش غذاء لنمو طفلي فقط.

الرضاعة احساس فطري جميل ربنا خلقه في كل الكائنات (الثدييات)  .. كل حيوان وانسان بيضم اولاده اول مايتولدوا عشان يرضضعهوهم، وهما سبحان الله تلقائيا بيروحوا لأمهم  حتى لو لسة مش بيقدروا يشوفوا، بيشموا ريحتها واول مايبدأوا يرضعوا بيسكنوا وبيهدأوا.


الطفل اللي بيرضع بيطمئن بحضن امه في هذا المشهد الفطري المؤثر  الجميل.

سبحان الله الطفل ده سواء كان حيوان او إنسان لو مارضعش من أمه مش حيموت، حيعيش عادي ولو لقى رعاية حياكل وينمو عادي برضو. ايوة طبعا تغذيته ومناعته مش حتكون هي هي، لكن حيكبر وكله تمام ..

طيب ايه الفكرة في الرضاعة بعيدة عن فائدتها الرهيبة؟



الرضاعة بتدي لهذا الكائن الجديد على كوكبنا احاسيس ومشاعر وطمأنينة فظيعة لايمكن مهما حصل ياخدها غير بالرضاعة. حتى لو أمه حضنته فهو برضو مش حيطمئن غير لما يرضع منها.

احيانا الرضيع بيكون بيصرخ ويتألم من مغص او شيء من هذا القبيل ومهما عملت مافيش حاجة حتسكنه غير الرضاعة من أمه.

لكن للأسف الرضاعة اتحاربت بشدة، بالذات اثناء وبعد الحرب العالمية لما رجالة كتير ماتوا والستات اضطرت تسيب البيبي  وتعول البيت بنفسها. بالتالي ظهرت اختراعات حديثة "للمرأة العصرية" مثل الحفاضات سريعة الامتصاص وغيرها.
بدأ تيار رضعي صناعي وافطمي من ٦ شهور او قبل، واكلي ابنك من ٤ شهور.. وتيار المأكولات المحفوظة للرضيع امثال سريلاك وهيرو وغيره بديل عن الطعام الطازج المصنع بالمنزل.. وبدأ معها تيارات تدعو لتدريب الرضيع انه ينيم نفسه عشان الأم تقلل من نفسها بعض المهام

 ومع رواج هذا التوجه في مجتمعنا انتشرت الجملة الشهرية "مادام راضع ومغير وشبعان يبقى سبيه يعيط"، وبدأ بذور التعذيب النفسي لهذا الكائن الغلبان اللي لا حول له ولا قوة.

 بدل مانلبي رغباته، اصبحنا نهملها بل وكمان نقعد نشتكي انه مغلبنا للي يسوا ومايسواش. بكائه ومغصه اصبح ازعاج، استيقاظه خنقة، وبقينا نصحيه وقت مانحب ولما يعوز ينام او يصحى برغبته بنكون مش طايقين نفسنا،

بعض الناس عندها تصور ان الكائن ده مش بيحس وإن تركه يبكي او اهمال رغباته مش حيعمل اي تأثير فيه للمستقبل مع إن الابحاث اثببتت العكس. الطفل من يوم ميلاده لسن ٥ سنين بيحصل فيه تطور اكتر من كل فترات عمره بنسبة ٩٠٪ من
وصلاته العصبية بتتكون. (ابحثو اكتر في الموضوع ده)

عدم تقبلنا لل " باكدج" بتاعة الخلفة خلانا مش متقبلين اصلا الرضاعة الطبيعية وبندخل صناعي من اول يوم، وبعدين مستغربين ليه عيالنا بيعيوا كتير!  تعب الرضاعة الطبيعي في اول ولادة تعب كبير شخصيا تعبت جدا فيه وماعرفش حد
مامرش بتعب فيه . ولكن بذرته بتطرح ورد وياسمين اه والله.

خارج مصر او الوطن العربي بالذات الدول الاجنبية اخرهم يرضعو حتى سنة، ولكن سبحان الله في توجه كبير جدا هناك لإمتداد فترة الرضاعة قد تصل عندهم لسن ٦ سنوات! وطبعا لا افراط ولا تفريط.

لكن اللي عايزة اقوله ان كل ما الغرب بيطلع بتوجه معين هووب نجري نقلده بدون مانشوف ده مناسب لثقافتنا، دينا، وقتنا، طبيعية حياتنا والاهم فطرتنا؟! مجرد بناخد منهم "العلم؛"، وسبحان الله  العلم في احيان كتير بيتغير وتلاقي اصاحب النظريات دي رجعوا في كلامهم ورجعوا للفطرة.

بعد ما حد زي ريتشرد فربر كان بيدعو انك تسيبي ابنك يبكي لحد ماينام ولو وصل لساعات، وان هو ينيم نفسه بنفسه، واديه سكاته او شيء يتعلق بيه بعيدا عنه. في المقابل ظهر تيارات كتيرة جدا بتحارب هذا المنهج وبتقول ان ده غلط جدا عالطفل. وظهر تيارات اخرى بتقول "دربيه عالنوم" وماترضعيهوش حتى النوم ولكن  منغير ماتسيبيه يبكي.

وفي المقابل في تيارات بتقول ماتعامليهوش كأنه انسان آلي ولا كائن اليف بتدربيه ، بل احترمي رغباته ولبيهاله ايا كانت وكوني طبيعية وارجعي لفطرتك في التعامل معاه. لفيه في البؤجة، ورضعيه للنوم او لما يحب يرضع رضعيه، مهما كان سنه، ماتحاوليش تفصليه عنك لأنك كل ماتفصليه كل ماحيلزق اكتر، وانك لو ادتيه الحنان ولبيتيله رغباته المشروعة هو حيستقل افضل جدااااا ولكن مش بالسرعة اللي تتمنيها بل بالسرعة اللي هو مستعد ليها.


البؤجة في كل الثقافات


بلاقي ناس بيوصوا بالرضاعة الطبيعية وبشدة، بس بيجولك من الصعيد الاخر ويقولك اوعي ترضعيه عند النوم او لما يبكي او خلافه، هو كدة حيربط اي زعل بالأكل، حيجيله التهاب في الاذن الوسطى، حيجيله تسوس، وغيييره من الاستنتاجات الغير مثبتة بالمرة. الموضوع بالنسبالي استفزازي جدا، لانهم بيشوهو فطرة جميلة زي الرضاعة وبدل مايكون الرضاعة طمئنينة وسكن وعاطفة وحب، تحول لغذاء زيه زيه اي اكلة وده مش صحيح.



هو مش واخدك سكاتة!

احيانا الطفل بيكون عايز يرضع كتير لسبب ما زي التسنين وقريفته..  ماتضغطوش عليهم وتمنعوهم منه عشان هما اللي في الم مش انتم، تخيلي سنتة بتشق في لثته وتخرمها وتطلع تخيلي الألم اللي بيشعر بيه.

ماتفطميهوش عشان مش بياكل كويس، اوعي تصدميه بإنك تقطعي عنه حبل التواصل القوي ده. انتي حتصدميه جامد جدا وبدل ما حياكل حيتعلق بيكي اكتر والاكل برضو مش حيتعدل. ف رضعيه زي ما هو ودوري على حلول منطقية لعدم اهتمامه باأكل واولها ماتضغطيش عليه ومش بالعافية.

أنا ححكيلكم تجربتي الشخصية مع الرضاعة:

اول ماولدت وبدأت ارضع الموضوع كان بيلهبني وبيوجعني وبيتشقق وبينزل دم زي اي أم جديدة.. لكن المشكلة بالنسبالي ان الموضوع وصل لتحجر كان ممكن يتحول لصديد لولا فضل الله واخدت جرعات مضاد حيوي في الوريد. وبعد مدة جالي احتقان في صدري وكنت بشعر كأن لسان ابني كله سكاكين.. كنت بحس ان صدري حريق مولع بيغلي من شدة الاحتقان. كنت بمشي تانية وسطي مش قادرة افرد ظهري من ثقل وجعي. الفترة دي كانت مؤلمة بكل معنى الكلمة بالذات اني كنت والدة قيصري كمان الحمدلله على كل شيء.

بس على قد كل التعب ده كنت مصممة من جوايا اني ماستسلمش ابدا للرضاعة الصناعي ولا اي رضعات تانية وكنت
بستحمل قلة النوم والاكتئاب عشان مارضعش غير طبيعي.

في البداية اول ٦ شهور كنت بنيم ابني في سريره، لكن لما بدأ يتحرك بدأ يجيليه ذعر كل مايصحى في سريره ف بقيت انيمه احيان كتير جنبي، بالذات في ليالي التسنين لما بيصحى كتير قوي. كنت بديه سكاتة من اول ماتولد لكن بطلتهاله على ٤ شهور وكانو ١٠ ايام صعبين جدا (بلاش سكاتة افضل) . كنت في البداية من انصار ماترضعيهوش حتى النوم وافصليه عنك وماتعودهوش عالشيل والكلام ده. لكن اكتشفت مع الوقت ان بجد احنا بنتعامل مع الطفل كأنه حيوان أليف بندربه او شيء غير مرغوب فيه بنحاول نفصله عننا! في ايه يا جماعة مش كدة!

ماتديهوش بدائل عن امه.. ماتديهوش سكاتة، او لعبة يتعلق بيها بشكل مفرط بديلة عنك. والعكس صحيح سيبي فطرته توجهه، لو هو عايز يحط صباعه في بوقه سيبيه وماتمنعيهوش. ماتنزليش تشتغلي عالأقل اول سنة صعب جدا عليه وعليكي الانفصال الطويل ده. لو شغلك راح ربنا حيعوضك بإذن الله، لكن اول سنة او سنتين من عمر طفلك لما تعدي مش بترجع تاني! ماتفطميهوش بإنك تحطي مر ولا بلاستر ولا غيره على صدرك عشان يكره الشيء اللي ارتبط بيه وحبه بالشكل ده. روحي لدكتورة رضاعة كويسة تنصحك تفطميه تدريجيا ازاي.

عايز يرضع.. مايرضع. عايز ينام طبعا ينام. مش عايز يروح لتيتا ماتضغطوش عليه. هو إنسان له رغباته واختياراته احترموها.

الفرق بين الرضاعة الطبيعي والصناعي
منظمة الأمم المتحدة بتوصي إن الطفل يرضع اول ٦ شهور رضاعة من امه طبيعية فققط! وماياخودش ولا صناعي ولا ماية واعشاب ولا اي شيء غير الفيتامين او دوا وما شابه. وبيكملوا إن الطفل مفروض يرضع لحد عمر سنتين وبعد ذلك كمان. وسبحان الله ده مذكور عندنا في القرآن.  

احنا ليه بنتحمس قوي لكل ما هو صناعي؟ دلوقتي تيار التوجه للولادة القيصري ظنا انه اريح من الطبيعي . مع إن الولادة القيصري الآلم اللي بعد الولادة جبار وبيكون صعب جدا إن الواحد يصد لوحده للبيبي. وبعدين نرضع صناعي عشان نريح نفسنا، طيب مانتي عندك تشفطي وترضعي طبيعي برضو!

ليه بنهضم في حق اولادنا بدل مانيجي على نفسنا شوية.  خلينا نحسب حياتنا صح ومانجريش ورا كلام بعض الدكاترة اللي بياخدو نسب من بيع اللبن الصناعي  وعلب الأكل وغيره كتير. خلينا نفكر بفطرتنا الطبيعية.

انا لما اخترت الاتجاه ده، اختارته لأن دي فطرة الله التي فطر الناس عليها، ولو حتختاري تنيميه جنبك او تشيليه في بؤجة او غيره، حتختاريه عشان هو عايز كدة وعشان راحته. ماتختاريش حاجة عشان الناس بتقولك ده صح، ومش اي نظرية او بحث حتقريه تمشي وراه.
ابحثي كتير لحد ماتوصلي الافضل والاصح لرضيعك وليكي :)



مصادر مهمة:
للإستشارات بخصوص الرضاعة الطبيعية الجروب ده ممتاز
جروب مساندة الأم المرضع
فوائد الرضاعة الطبيعية
توصيات الأمم المتحدة
normal-infant-sleep-night-nursings-importance


للتواصل ومناقشة ارائكم في التعليقات او المجموعة عالفيسبوك:

تعليقات

  1. رائع يا أميرتي
    استمري بجد
    كلامك مفيييد جدااا لكل بنت
    ربنا يهدينا و يعينا علي تربيه اولادنا

    ردحذف

إرسال تعليق

المشاركات الشائعة من هذه المدونة

تنظيم نوم الرضيع من عمر ٣ أشهر

تجربتنا مع الفطام

لغبطة التدريب عالحمام.. من الميلاد ؟ من عامين؟