نشاطات في البيت لصالح :) من ٦ شهور

السلام عليكم

بقالي ٤ ايام وقتي مكدس زيادة عن الطبيعي، وده بسبب متابعتي لمؤتمر حياتي مدرستي..

 من اكتر الحجات اللي بتساعدني اكمل في عز التعب والضغط اني اقرأ، واتابع امهات ايجابيات واشوف فيديوهات. بحب جدا كمان اتفرج على النشاطات اللي بلاقيها مناسبة لسن ابني على موقع بينترست .
لكل للاسف بقالي فترة كنت حاسة بملل مش عارفة اعمل لصالح ايه، وكتير بحس بإحباط من نفسي، يا ترى انا أم كويسة؟ يا ترى ابني مبسوط ولا زهقان ولا مش حاسس بحنان كافي، يا ترى انا بساعده عالنمو ومش بضغط عليه، بحترمه كإنسان صح؟  ولا ولأ


بس من ساعة مابدأت اتابع فيديوهات مؤتمر حايتي مدرستي (اول مؤتمر اونلاين مجاني عن التعليم المنزلي والتعليم المبكر) حسيت اني رجعتلي طاقة من جديد والنشاط جوايا زاداللهم بارك.
من اكثر الفيديوهات اللي الهمتني في الفترة الحالية كان فيديو عن اللعب الحر لآيات تليمة، فيديو أنماط التعلم ل إلهام فتحي، وفيديو ا/ سناء عن التربية الاسلامية.
(لمتابعة مدوني ايلي  اضغط هنا
ولكن اكتر فيديو اداني حماس كان فيديو د/ دعاء مجدي عن التعليم المبكر لتناسبه مع سن ابني وكم المعلومات اللي اثرت 
حماسي والهمتني لبعض النشاطات. ( لمتابعة مدونتها اضغط هنا

تقدروا تشوفوا كل الفيديوهات من هنا :)


زي اي أم نفسها تشوف ابنها فرحان، بتضايق من الروتين اللي بيصحاله كل يوم، نفس اللعب وبعدين قريفة وزهق وهكذا، مع اننا لو اشتغلنا على افكار جديدة وحاولنا بإستمرار تسليتهم حنشوفهم مبسوطين واحنا كمان حنتبسط :)

صحيت النهاردة وانا جوايا عزم اعمل بعض النشاطات الجديدة والمختلفة لصالح :)

الافكار دي تناسب من ٦ شهور لحد ال ٦٠ سنة.. اه والله حتشوفوا ازاي :)

يلا بينا...



عملي الفني الأول ^^
وأنا طفلة كنت شخصية فنية من الدرجة الاولى، ولأني مستعجلة دايما ف كان نفسي اشارك ابني كمان،، بس ازاي وهو كل حاجة بتتحط في بوقه والالوان مش صحية وقد تكون سامة!
الوصفة دي جميلة جدااا وسهلة قوي.
الطريقة: تخلطي كوب دقيق وكوب ماء كويس لحد القوام اللي تحبيه، وبعدين تقسميهم على سلاطين تحطي في كل واحدة لون طعام مختلف وتقلبي.
حتلبسي ابنك حاجة عشان مايتوسخش وتحطيهم على ورقة لزقة ب 
blue tac
 او على صينية الكرسي بتاعه.. وسيبيه يستمتع.
ايوة اكيد صالح اكل الالوان بس كمل بعد كدة وكان مبهور قوي.
النشاط ده بيشتغل عالجناب الحسي والبصري وطبعا الحركي :)
 للسن الاكبر ممكن هما يشاركوا في عمايل الالوان وده حيبطيهم جدا انهم يحسوا انهم عملوا حاجة بنفسهم :)

المضحك في الموضوع ان الجاكت او الاوفراول دي كانت بتاعتي وانا طفلة عشان كدة ضخمة على صالح :D بس بإذن الله حجيبله واحد مقاسه.

النشاط التاني بيشتغل على حاسة الشم عنده، وكنت شوفته في مدونة 





كانت حاطة البهارات في اكياس الملبس بتاعة السبوع، بس انا ماكنش عندي! فكرت كتير استخدم ايه.. لقيت ان عندي قماش زي التول سميك عملته زي البونبوني وربطته كويس قوي بالشريط زي مانتم شايفين.
الفكرة دي نجحت الحمدلله وصالح حبها قوي ، بس كان بياكلها طبعا^^ هما سنهم كدة ولكن من قوة الريحة كان بيعمل تعبيرات مختلفة لما يقرب كل كيسة من وشه :)
المكونات: اي توابل ذات قوم سميك، مثل الحبهان، القرنفل، القرفة، كركاديه، نعناع وهكذا
انا شخصيا استمتعت قوي وقعدت اغمض عيني واخمن ايه الريحة ^^ ممكن لو اولادكم كبار شوية تشمموهالهم الاول ويعرفوا نوعها وبعدين يربطوا عيونهم ويخمنو وممكن كمان يكتبوها او يذوقوها :)



ودي بقى لأولادنا عاشقي شد المناديل من العلب ^^


 اي علبة مناديل فاضية وفانلة داخلية بيضاء قديمة، حتقطعيها زي المناديل وتحشريها وسيبيه يستمتع بقى المرادي هو حر :D



وده بقى اعزائي المشاهدين الصلصال المنزلي الرائع اللي مانفعش معانا لان كله ملح وماستريحتش خالص وصالح بياكله ^^ بس جربوه وحينفع جدا سن اكبر :)
للطريقة
اضغط هنا





دي فكرة زي خيوط العنكبوت كل ما سنه يكون اكبر تكتريها وهو يجيب اللعب. وممكن لسن كبير يغمي عينه بشريط ويخمن باللمس :)
 

لعبة عملناها في بيت تيتا من النشا والزبادي
 


رغاوي ملونة من الوان الطعام وزودنا حجمها بمضرب البيض 
 


وده نشاط لطيف جدداا وممتع بالنسباله وكمان بيشتغل عالحواس 
وبيحفز عالحركة.. 

 جبت شرايط بملامس والوان مختلفج ولزقتها في طرابيزة السفرة من فوق .. صالح كان لسة باديء يحبي وقتها وماكنش بينزل تحت الطرابيزة وانا حبيته يستكشف المنطقة دي ويلعب كمان. وبالفعل الشرايط دي بقت تخليها ينزل تحت الطرابيزة ويتشجع ويتحرك اكتر. وكان كل يوم بيروحلهم يشد فيهم ويمسكهم :)

ملحوظة هامة حاولي تكوني جنبه دايما عشان الشرايط ماتلفش حول رقبتع او اعمليها قصيرة جدا للامان :)
--بو عايزاه مونتيسوري بلدم كب الشرايط حجم واحد وطول واحد وبون واحد والاختلاف يكون في الملامس ققط عشان يركز على حاسة واحدة-- فصل الخواص

هنا احدى سلات الكنز الخاصة بنا :)
للمزيد:




محتوايات اخرى لسلة الكنز بتاعتنا
ودي من اكثر النشاطات بساطة وسهولة واهمية واثارة للحواس


.ودي زجاجة بلاستيك فاضية فيها خرز وشرايط زرقاء كنت حطاها في سلة الكنز الزرقاء 
دي بقى حيقعد يرج فيها ويجري وراها وهي بتدحرج :)
وممكن تتملي حجات كثيرة جدا.. ابحثوا عن 
Sensory Bottles
في



عشان تسهلوا على نفسكم. انزلوا يوم الزنقة لوحدكم واشتروا كل الخامات اللي تخطر على بالكم واعملوا صندوق خاص بيها ليكم انتم، بحيث كل ماتعوزوا تعملوا حاجة تجيبوا منها :) 


ملحوظة هامة.. سيبي ابنك/ بنتك يكبروا بإنهم يختبروا الحياة ويلعبوا بجد وده معناه حيلغوصوا ويتوسخوا ويوسخوا. حبي ابنك اكتر من التنظيف لوسمحتي.
حتلاقي وقت تعملي اللعب بس اتشجعي وماتكسليش ^^

ملحوظة اخيرة: على فكرة ابني زي اي بيبي مش بيطولوا في النشاط واحيانا كتير بعمل حجات ومش بتجذبه، عادي جدا كل ماحيكبروا كل ماحيهتموا اكتر وصدقيني ال خمس عشر دقايق دول بسطوه جدا واتعلم منهم :) <3


للمزيد من النشاطات من ٦ شهور 

في انتظار مشاركتكم بالانشطة والاقتراحات :)

للتواصل والاقتراحات في التعليقات او المجموعة عالفيسبوك:

تعليقات

المشاركات الشائعة من هذه المدونة

تنظيم نوم الرضيع من عمر ٣ أشهر

تجربتنا مع الفطام

لغبطة التدريب عالحمام.. من الميلاد ؟ من عامين؟