للسفر سبع فوائد

للسفر سبع فوائد !
بتاريخ‏21 يونيو، ٢٠١٣
مؤخرا بعد تولي مسؤلية مويك مشروعات والعبد لله مش لاقي وقت لنفسه، وبشعر كثيرا ان مش مفروض يبقى ليا وقت لنفسي اصلاً! من
 اجتماعات برة البيت لشغل عالحاسب في المنزل الخ الخ .. بس ربنا انعم عليا وهداني برحلتين تريح نفسيتي واعصابي وتدي لبدني حقه! ما شاء الله :P

الاولى تركيا والثانية للحجاز :)

قد ايه الإنسان لازم يدي لنفسه ساعة راحة زي ما بيدي لرسالته معظم وقته .. إن لبدنك عليك حق! (بس ماتطولش قوي ^_^

إنسان بينسى من هو ، ينسى انه بيتعب وان عشان يكمل بقوة لازم يدي لعقله راحة من التوتر والانشغال المتواصل !

وأجمل شيئ أنه يستغل الراحة دي في عبادة التفكر :)

أحلى حاجة في الراحة والسفر انك تتفكر في خلق السماوات والأرض.. عبادة التفكر المهجورة اللي قعد يبكلها النبي صلى الله عليه وسلم

… ورد عن عائشة - رضي الله عنها - أن رسول الله - صلى الله عليه وسلم - استأذنها ذات مرة في أن تتركه يقوم الليل؛ وقد كانت - رضي الله عنها- تحب قربه والجلوس معه، فتركته - صلى الله عليه وسلم - لقيام الليل، فقام من الليل يصلي ويبكي حتى آذنه بلال بأذان الفجر، فسأل رسول الله - صلى الله عليه وسلم - عن حاله، فقال له: (لقد أنزلت عليّ الليلة آيات ويلٌ لمن قرأها ولم يتفكر فيها).

والآية هي: 

(( إِنَّ فِي خَلْقِ السَّمَاوَاتِ وَالأَرْضِ وَاخْتِلاَفِ اللَّيْلِ وَالنَّهَارِ لآيَاتٍ لِّأُوْلِي الألْبَابِ الَّذِينَ يَذْكُرُونَ اللّهَ قِيَاماً وَقُعُوداً وَعَلَىَ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالأَرْضِ رَبَّنَا مَا خَلَقْتَ هَذا بَاطِلاً سُبْحَانَكَ فَقِنَا عَذَابَ النَّارِ.. الآيات))(190) سورة آل عمران.


ولذلك نعود للموضوع الرئيسي وهو فوائد السفر السبعة ...

وبعيدا عن رقم سبعة اللي أنا ماعرفش ايه تعريفه بس هو رقم رباني جداً

يعني ربنا خلق الكون في ست ايام ثم استوى على العرش في السابع .. ده غير السبع سماوات!

والاهم اننا بنطوف حول الكعبة سبع لفات وبنسعى في الصفا والمروة سبعة برضو ..

لذلك أكيد السفر ليه سبع فوائد ...

بس أنا حعدي ال٦ فوائد وحنتقل للفائدة رقم ٧ على طول :)




الفائدة رقم ٧:

الجهاد الحق

روحت تركيا من قيمة شهر… ايون تركيا اللي فيها الهوجة اليومين دول،، متضايقين من التقدم اللي بلدهم وصلتله .. ما علينا…

تركيا بلد يسحرك جمالها من جوامع ومساجد من ايام العثمانيين والبوسفور وبحر مرمرة والتلال والبيوت الخلابة والقصور العتيقة .. بلد فعلا في غاية الجمال!

بس الغريب في كل ده إن لو دققت حتلاقي بلادنا أحلى ألف مرة بس احنا اللي دمرناها لحد ما نورها انطفا! ( بعيدا عن قطع النور) ^ـ^

((ظهر الفساد في البر والبحر بما كسبت أيدي الناس ليذيقهم بعض الذي عملوا لعلهم يرجعون)) الروم ٤١

الذي عملوا !

طيب خلينا ندخل في الموضوع!

شوفت في تركيا نظافة!

ايون نظافة!

اكتشفت اننا شعب مش نظيف بطبعه ، اسفة جدا عاللفظ بس الصراحة راحة!

شوف حي في بلدنا مافيهوش زبالة؟

كفاية الزبالين البلطجية اللي بيتعاركوا ليل ونهار عشان يحتلوا مناطق معينة في المدينة.

عندك الشعب المتعلم في مدارس مفروض دولية بيرمي زبالته في الشارع وايه اللي حيفرقني عن غيري! او اقلها يرمي زبالته في النيل او البحر! اصله بيشكر ربنا على نعمه بالطريقة دي. عجبي

الالعن لما كنت في السعودية وسبت الفندق الفاخر عشان اروح ابراج زمزم الفاخرة برضو، اخويا قصد يعدينا من شارع جانبي عشان اشوف المهزلة اللي تبعد من الحرم المكي بأمتار قليلة!

مش عايزة اقسم بربي اني ماشوفتش شارع اقذر من كدة ، مافيش مكان مافيهوش زبالة! والالعن ان المسلمين من جميع اقطار العالم قاعدين جنب الزبالة هما اللي رمينها!

اكاد لا أصدق عيني!

لا صدقي يا حلوة .. اصل المسلمين اللي في بلدنا عايشين في عالم الأفكار والكلام المعسول! ماحدش انتقل لعالم الافعال ، ممكن يكون راح جاهد بالقتال وجزاه الجنة على ذلك بس ماحدش فكر يجاهد الجهاد الاكبر ويصلح من حال شعبنا الفقير ! مش فقير بفلوس! لا ابدا نحن فقراء خلق ودين ونظافة وعقل ... الخ

الغريب ان تركيا النظيفة اللي مش بتشم لحد ريحة عرق ولا سجاجيد مساجدهم رحيتها وحشة من الشرابات العفنة!

واقعيا لو اتكلمت معاهم مش حتلاقي حد فيهم مفكر فز زي شبابنا اللي زي الورد، ماحدش قرأ للمسيري او قطب او غيرهم الا قليل.

لكن الشعب كله من افقرهم لاغناهم خلوق ، نظيف ، يسعى جاهدا انه ينهض بشعبه!

مافيش حي الا ومتشجر و كل الشوارع فيها ورود ، ماحدش بيرمي حاجة في الشارع. تصحى الساعة ٧ صباحا تلاقي الشوارع مكتظة بالناس اللي نازلين عملهم او دراستهم في جميع الاعمار. كل واحد بيمد ساعي ورا عمله! ماحدش بيبص على ست معدية ولا .... !! ماحدش بيولع السجارة ولسة حيسرح في همومه!

مش عايشين في عالم الافكار، عايشين في عالم الافعال!




مدارس تاخد طلابها للحدائق ليتنفسوا هواء نقي ويلعبوا عشان سنهم سن انطلاق مش سن خنقة!

اهتمام بالمواصلات عن طريق المعديات اللي ممكن نستخدمها في القاهرة في النيل! وايضا الاوتوبيس مترو اللي طريقه واحد مش بيشاركه فيه حد عشان كدة عمرك ماتلاقيه بيقف في الزحمة! 

جوامع ومساجد زي الفل ريحتها انضف منمكتب مدير شركة عملاقة عندنا في مصر! حتى بياع الصميت في بلدهم انضف مني :/

في الاجازة بياخدو العيال يصتادوا او يتفسحو في الجنينة المجاورة بدون بذر بطيخ او صوابع ورق عنب!

الرئيس لا ينشغل بالمشاكل السياسية لدولته بل يسعى لحل ازامتهم اليومية وينقل كلامه لافعال تنفيذية لاصلاح حال المواطن التركي اسلامي او علماني! الكل في حال جيد!

حقول ايه ولا ايه ولا ايه!

في تركيا .. رأيت إسلام .. وايضا رأيت مسلمين يا جدع!

((وقل اعملوا فسيرى الله عملكم ورسوله والمؤمنون وستردون إلى عالم الغيب والشهادة فينبئكم بما كنتم تعملون))

اعمل لتحسين وضع بلدك وامتك! سيبك من السياسة اللي لا تسمن ولا تغني من جوع!

بلدك محتاجاك ، واكتر حاجة اتعلمتها كانت ان العمل التطوعي هو الحل لنهضة بلادنا لو كل واحد كرس وقته ليه بجد حنعمل معجزات!

إن الله لا يغير ما بقوم حتى يغيروا ما بأنفسهم

انت ايوة بكلمك انت !

مستني ايه؟ فرج ربنا؟!!

مش بيجي لوحده... فرج ربنا بيجي مع سعيك واخلاصك لتحقيق هدفك! وياريت هدفك ده مايكنش هدف ذاتي اناني. امتك محتاجة مجهودك. اتحرك اتغير!

اشتغل اكتر ، ربي عيالك احسن، بر والديك، قاوم البيئة المحبطة واستعين بالله

----

دمتم مستخدمين ،،، تجاهدون حق جهاده :)

{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ} سورة العنكبوت: 

تعليقات

المشاركات الشائعة من هذه المدونة

تنظيم نوم الرضيع من عمر ٣ أشهر

اصنع بنفسك "مسجد للأطفال" ...نشاط رمضاني

تجربتنا مع الفطام